Është bërë e mundur zbardhja e vjedhjes së një shume të madhe parash në automjetin e shtetasit F. B. Si autorë të dyshuar të ngjarjes janë prangosur 2 personat, H., 27 vjeç, banues në Tiranë, i dënuar më parë për veprën penale “Prodhimi dhe shitja e lëndëve narkotike” dhe K. 44 vjeç, banues në Tiranë; i dënuar më parë për veprën penale “Vjedhje”.
Të dy autorëve të dyshuar në momentin e ndalimit iu janë sekuestruar në cilësinë e provës materiale 17.5 milionë lekë të reja dhe 50 mijë franga.
Policia bën me dije në njoftimin për mediet se “Strukturat për Hetimin e Krimeve të Komisariatit të Policisë Nr. 2, pas denoncimit të marrë nga shtetasi F. B., se më datë 22.05.2020, rreth orës 19:00, pranë Qendrës Kristal, në zonën e Komunës së Parisit, persona të paidentifikuar i kishin vjedhur një shumë të konsiderueshme parash prej 20 milionë lekësh të reja dhe 50 mijë franga, në automjetin e tij tip “Range Rover”, organizuan punën per zbulimin, lokalizimin dhe kapjen e autorëve.
Falë veprimeve të shpejta, informacioneve të marra në rrugë operative dhe ndjekjes intensive për 24 orë u bë i mundur zbulimi dhe identifikimi i autorëve të kësaj ngjarjeje.
Nga veprimet hetimore rezultoi se këta dy shtetas kishin ndjekur lëvizjet e shtetasit F. B. dhe në momentin që ky shtetas është futur në qendrën tregtare, ata i kanë vjedhur shumën e parave në bagazhin e automjetit. Në momentin e kapjes, këtyre shtetasve iu janë gjetur dhe sekuestruar në cilësinë e provës materiale një sasi parash prej 17.5 milion lekësh të reja dhe 50 mijë franga”.
Dy personat e arrestuar dyshohet se janë pjesë e një bande që vepronte me grabitje prej një kohe të gjatë në kryeqytet.
