Mbledhja e grupit të punës të Këshillit Politik për Reformën Zgjedhore që po zhvillohet në Pallatin e Kongreseve, është ndërprerë në mënyrë të papritur.
Mësohet se shkak për këtë janë bërë debatet e forta mes përfaqësuesit të Partisë Socialiste, bashkëkryetarit të komisionit të Reformës Zgjedhore Damian Gjiknuri dhe nënkryetarit të LSI, përfaqësuesit të opozitës Petrit Vasili.
Mbledhja u ndërpre për një pushim të shkurtër deri sa palët janë qetësuar dhe ka rinisur përsëri.
Kjo përplasje ka ardhur përsa i përket deklaratave të djeshme të kryeministrit Edi Rama në lidhje me Reformën Zgjedhore, i cili u shpreh se propozimet e vetme që do të merren parasysh janë ato të OSBE/ODIHR.
Nga ana tjetër vetë opozita beson se pas tyre fshihet qëllimi i tij për të shkatërruar konsensusin për reformën zgjedhore.
Kujtojmë se mbledhja asistohet nga OSBE që ka siguruar ambientin dhe masat mbrojtëse për të pranishmit.