Sekretari i Përgjithshëm i Partisë Demokratike, Gazment Bardhi hedh akuza mbi kryeministrin Rama se është arsyeja se pse Shqipëria është vendi i fundit në rajon për ndihmën ndaj qytetarëve dhe biznesit.
Përmes një postimi në rrjetin social Facebook, Bardhi citon një artikull të revistës Monitor, shkruan se “Edi Rama ka dhënë vetëm 41.5 milionë euro për 3 milionë shqiptarë, aq sa paguan 2 oligarkë tek Unaza e Re.”
Midis të tjerave, Bardhi shkruan se kemi humbur 10-fishin e vendeve të punës në krahasim me vendet e rajonit nga kriza e Covid-19. Kjo sipas tij, do të thotë më shume varfëri.
Postimi i plotë:
Për shkak të Ramavirusit, Shqipëria është vendi i fundit në rajon për ndihmën ndaj qytetarëve dhe biznesit. Edi Rama ka dhënë vetëm 41.5 milionë euro për 3 milionë shqiptarë, aq sa paguan 2 oligarkë tek Unaza e Re.
Gjendja është shumë e rënduar mga pandemia ekonomike, e shkaktuar prej një qeverie dhe kryeministri të dështuar. Bizneset po mbyllen dhe, bashkë me to, edhe vendet e punës.
Kemi humbur 10-fishin e vendeve të punës, në krahasim me vendet e rajonit, që do të thotë më shumë varfëri, më pak zhvillim. Shqiptarët nuk e meritojnë të jenë për gjithçka të fundit vetëm se kanë një qeveri që i vjedh dhe i braktis në ditën më të keqe.
