“Asnjë ndihmë nuk kemi parë me sy!” Tregtarët e revoltuar ankohen te Basha, kryedemokrati: Kjo është Shqipëria reale

Kryetari i Partisë Demokratike Lulzim Basha ka zhvilluar sot disa takime në terren në tregun agro-ushqimor të Rrogozhinës, ku është përballur me indinjatën e tregtarëve të zonës në lidhje me situatën e dobët ekonomike.

“Asnjë ndihmë nuk kemi parë me sy! Asnjë! Fare!”, është shprehur njëra nga gratë që bënin biznes aty.

Ndërsa një shitëse, ndër të parat që u takua me Bashën, tregoi për vështirësitë që po përballonte e vetme, pa asnjë mbështetje nga pushteti lokal: “Jam vet i katërt. Vet sëmurë, burrin sëmurë. Kam dy goca. I kam kërkuar këtyre këtu… telefon me bë detyrat!!! “Jo po nuk bëhet….” Ndihmat kanë shkuar ku ka vila. Ndihmat në vila. Tallen me ne.

Më thanë këtu që”jepi helm burrit”. Helmoje!!! Unë të ha burgun dhe të le fëmijët jetimë. Ku shkojnë këto taksat tona?! Asnjë lloj gjejë nuk na kanë sjellë. Unë deri në orën 9 jam këtu. Burrin e kam me depresion, ku ta çoj që të humbasë mendjen…Gocën e madhe e kam në vitin e parë. Goca ime nuk fiton dot notën e vet në shkollë, se e thotë ai “e kam vulën unë”. Dhe nuk më jep deftesën. Fëmijët e mi, që jam gjysëm robi, po rriten rrugëve. Nuk më përfillin, as drejtim shkollës s’m’i japin. Ia paguaj shtetit me ujë të gjitha. Nëse pot ë rrej…Hajde me mua, t’i shikojmë të gjitha,” insistoi zonja.

Nga ana tjetër Basha përmes nëj video-selfie tha se gjendja e fermerëve është aq e keqe sa e bizneseve, pasi konsumi sipas tij ka rënë në zero. Ndërkaq thekson se askush nuk ka marrë ndihmë, duke hedhur akuza ndaj qeverisë e cila sipas tij po bën propagandë për të fshehur dështimin.

“Jam në tregun e Rrogozhinës në këtë lidhje të drejtpërdrejtë. Gjendja e fermerëve është po aq e keqe sa gjendja e bizneseve. Konsumi ka rënë në zero. Rrinë këtu me orë të tëra. Askush nuk ka marrë ndihmë. Ky është realiteti, përpara kam kilometra me tezga, gjysmën e tyre do e groposin produktin sepse nuk u shiten.

Ndaj bredhjet dhe propaganda e qeverisë nuk mund të fshehë dështimin. E keqja po vazhdon të thellohet. Vetëm te Teatri Kombëtar duan të harxhojnë 30 milion euro. E kanë mendjen vetëm të zhvasin dhe të grabisin. Kjo është një Shqipëri e robëruar. Shpëtimi i vetëm është që ju me votën tuaj ti drejtohemi kutive dhe t’i japim fund kësaj të keqje. Kjo situatë duhet të marrë fund.

Gjithë Shqipëria punon për 5 oligarkë. Ky është realiteti nga tregu i Rgozhinës, kjo është Shqipëria reale”, deklaroi lideri demokrat.