Një mesazh i fortë vjen së fundmi nga Papa Françesku.
Ai ka bërë thirrje që bota të ketë një vizion të përbashkët pas krizës nga koronavirusi, dhe shton se lëvizja pa solidaritet global apo përjashtimi i sektorëve të shoqërisë nga rimëkëmbja, do të rezultonte në “një virus akoma edhe më të keq të indiferentizmit egoist”.
“Mëshira nuk i braktis ata që mbeten pas. Tani, ndërsa mendojmë për daljen e ngadaltë e të lodhshme nga pandemia, na cenon pikërisht ky rrezik: të harrojmë ata që kanë mbetur mbrapa.
Ka rrezik të na godasë një virus akoma edhe më i keq, ai i egoizmit indiferent. Transmetohet, duke u nisur nga ideja se jeta përmirësohet, nëse përmirësohet për mua; se gjithçka do të shkojë mirë, nëse do të shkojë mirë për mua.
Fillohet këtu e arrihet në përzgjedhjen e njerëzve, në mënjanimin e të varfërve, në sakrifikimin e atyre që kanë mbetur pas në altarin e progresit”, u shpreh Papa gjatë Meshës në Mëshirën Hyjnore të dielën në kishën pothuajse të zbrazët si kurrë më parë.
Ati i shenjtë i Vatikanit tha se pandemia nuk përzgjedh, ajo na kujton se jemi të gjithë njëlloj dhe se tani është koha për të zhdukur pabarazitë.
