Jo vetëm koronavirusi, UNICEF ngre alarmin: Ja nga çfarë po rrezikohet tjetër bota

Fondacioni për Fëmijë i Kombeve të Bashkuara (UNICEF) paralajmëroi për mundësinë e shpërthimit të fruthit, për shkak të pandemisë së koronavirusit.

UNICEF tha se disa programe të vaksinimit janë shtyrë për shkak të krizës globale shëndetësore.

Në 37 vende, 117 milionë fëmijë mund të mos imunizohen me kohë ndaj fruthit, tha UNICEF.

Fruthi, i cili shkakton kollitje, skuqje dhe ethe, mund të parandalohet me dy doza të vaksinës së njohur si MMR.

Në mesin e vendeve që kanë vendosur të shtyjnë vaksinimet për fruth, janë: Bangladeshi, Brazili, Bolivia, Kamboxhia, Etiopia, Somalia e të tjera.

“Ndërprerja e vaksinimit rutinor do të rrisë rrezikun që fëmijët të kontraktojnë sëmundje vdekjeprurëse”, tha zëdhënësja e UNICEF-it, Joanna Rea.

Fruthi është sëmundje ngjitëse dhe potencialisht fatale.

Organizata Botërore e Shëndetësisë, muajin e kaluar, e ka shpallur sëmundjen COVID-19, që e shkakton koronavirusi, pandemi globale.

Mbi 1.9 milion njerëz në botë janë prekur nga kjo sëmundje, ndërsa mbi 120,000 kanë humbur jetën. Rel