“Jeton në Hënë në kushte normale, merreni me mend tani”/ Rudina Hajdari reagon pas deklaratës së Kryeministrit Rama

“Zonja Hajdari na drejtohet nga hëna edhe në kushte normale, merreni me mend tani edhe në hënë edhe në karantinë sesa lidhje kanë fjalët e saj”, pas kësaj deklarate të kryeministrit të vendit, Edi Rama ka reaguar menjëherë deputetja Rudina Hajdari.

Përmes një postimi në rrjetet sociale, deputetja Hajdari ia ka kthyer ironinë Kreut të Qeverisë duke e akuzuar gjithashtu për ndarje të pasurisë së vendit me të tjerë politikanë.

Postimi i plotë i deputetes:

Z. Rama sot më akuzoi se jetoj në hënë.

Në fakt atij ka kohë që hënë i duket e gjithë Shqipëria sepse është izoluar në anijen e tij kozmike në Surrel dhe nuk sheh e nuk dëgjon se çfarë realisht ndodh në këtë vend.

Nuk e sheh varfërinë që është shtuar, nuk e dëgjon dhimbjen e familjeve të përgjysmuara nga emigrimi, nuk e shikon papunësinë e as nuk do t’ia dijë për korrupsionin dhe arrogancën që po e shkaktojnë.

Në anijen e tij kozmike prej betoni, ku ndan pasuritë e vendit me të tjerë “kozmonautë”, këto halle duket sikur i vijnë nga larg, shqiptarët i duken si alienë e ne që jetojmë mes tyre e flasim gjuhën e tyre, sikur jetojmë në hënë.

Keqardhje!