Në një kohë kur qeveria shqiptare është duke përforcuar masat për parandalimin e koronavirusit, fondacioni “Fundjavë Ndryshe” është pranë familjeve shqiptare që ndodhen në izolim. Menjëherë pas rasteve të evidentuara me COVID-19 dhe shtrëngimit të masave nga autoritetet, drejtuesi i fondacionit, Arbër Hajdari bëri me dije po përgatiteshin nga fondi i emergjencës pako ushqimore dhe ndihma për mijëra familje.
Në kushte maksimale sigurie prej rreth një jave, stafi i “Fundjavë Ndryshe” ka nisur shpërndarjen masive të ushqimeve për mbi 8000 familje të izoluara në zona të ndryshme të vendit. Në pakot që janë shpërndarë, veç ushqimeve ndodhen dhe produkte të higjienës si sapunë, detergjente, dezinfektant.
Në këto ditë kur Shqipëria dhe e gjithë bota po përballet me një Emergjencë Shëndetësore për shkak të virusit vdekjeprurës që po tmerron botën, nevoja më e madhe vjen nga të varfrit, jetimët. Të cilët përveç izolimit përballen edhe me mungesën e ushqimeve dhe nevojave bazike. Prandaj fondacioni “Fundjavë Ndryshe” ashtu siç pas fatkeqësisë të madhe të ndodhur para pak muajve, tërmetit, do të jetë pranë tyre çdo ditë, për ta përballuar të gjithë së bashku këtë situatë që po mban botën në alarm.
Gjithashtu fondacioni “Fundjavë Ndryshe” ka nisur edhe një fushatë online, ku të gjithë shqiptarët mund të kontribuojnë, për të ndihmuar ata të cilët janë në pamundësi ekonomike në ditë të vështira.
Kujtojmë se Ministria e Shëndetësisë ka bërë të ditur se numri i të prekurve me COVID-19 në Shqipëri ka shkuar në 51, gjithashtu është shënuar dhe viktima e parë. Ndërkohë ekspertët këshillojnë qytetarët të qëndrojnë në shtëpi duke ndjekur rekomandimet e tyre për të frenuar përhapjen e virusit vdekjeprurës.
