Rritet bilanci, shkon në 10 numri i të prekurve nga koronavirusi në Shqipëri

Ka shkuar në 10 numri i personave të prekur nga koronavirusi në Shqipëri.

Mësohet se katër analizat kanë konfirmuar prekjen e katër personave të tjerë.

Në një deklaratë për mediat, zv.ministrja e Shëndetësisë Mira Rakacolli ka bërë me dije se  deri më tani janë ekzaminuar 114 raste, ku 10 prej të cilëve kanë rezultuar pozitiv.

Ajo ka bërë thirrje qytetarëve që të marrin të gjitha masat për të bërë të mundur që Covid-19 të mos përhapet.

“Deri sot janë testuar 114 raste të dyshuar, prej të cilëve vetëm 10 janë pozitiv. Ato që kanë qenë dje babë e bir, 6 që janë konakte të këtyre të sëmurëve dhe dy raste të reja të palidhura me këto raste. Një që është i shtruar në Infektiv dhe ka një histori udhëtimi në Milano një ditor, dhe një në spitalin e Durrësit”-tha ajo.

Më tej, ajo iu bëri thirrje të gjithë qytetarëve të shmangin të gjitha kontaktet me njerëzit, daljet, por edhe daljet dhe transportin publik.

E theksoj shumë karantinimin e detyrueshëm. Është shumë i rëndësishëm sepse jep disa gjëra të mira. Shmang kontaktet e këtyre njerëzve dhe duhet të merren masat. Nuk po zbatohen masa. Kemi njerëz në kafene e restorante shumë, të kufizojmë transportin publik. Të shmangim daljet e panevojshme nga shtëpia. Duhet të evituar transportin publik, udhëtimet ndërkombëtare. Nëse marrim këto masa, i kemi strukturat për të përballuar çdo lloj situate. Sistemi është në këmbë por sjellja nuk është në përputhje me panikun. Ulemi në kafene dhe diskutojmë për Covidin.“-u shpreh zv.ministrja.