Gazetari i njohur Mustafa Nano ka komentuar së fundmi marrëdhënien e kryeministrit Edi Rama me mediat.
Sipas tij, fjala e kreut të qeverisë në kongresin e Partisë Socialiste dhe sfida që bëri ndaj mediave, ai e cilëson si një problem të Ramës me zërat që e kritikojnë.
I ftuar në studion e TEMA TV, Nano foli edhe mbi fjalën e kryeministrit, i cili deklaroi se: ne jemi media më e madhe në Shqipëri. Kemi njëqind e ca mijë njerëz në terren. Të bëhen të gjithë bashkë media nuk na mund dot ne në informimin e punëve që bëjmë”.
Nano e sheh këtë si një frikë që ka Rama ndaj mediave dhe zërave që e kritikojnë.
Ai gjithashtu foli edhe për fjalimin që mbajti bashkëshortja e kryeministrit, Linda Rama gjatë një prej ditëve të Kongresit dhe tha se këto janë zakonte despotike.
Sipas Nanos nuk ka arsye që zonja e Ramës të mbajë fjalë në kongres, ndërsa përsa i përket vë kryeministrit ai duhet të shkojë te psikologu sepse tregon qartë që ka një ankth për mediat dhe ajo është e vetmja mënyrë për ta zgjidhur.
“Ky kryeministër ka ca probleme, nuk duron dot zëra kritikë. E gënjen mendja se është babai i kombit.
Për mua duhet të shkojë te psikologu, sepse nuk shoh si mund të zgjidhet ndryshe ky ankth që ka ai me mediat.
Ai tani ka filluar ta ngjyrosë familjarisht. Nuk shoh arsye pse duhet të dimë emrin e djalit të kryeministrit.
Këto janë zakone despotike, siç janë bërë publike emrat e fëmijëve të Enver Hoxhës.
Nuk shoh arsye pse në kongres të mbajë fjalë zonja e Ramës. Nuk ka tagër, nuk është anëtare.
Pse nuk më ftojnë mua të mbaj fjalë atje. Nuk e kuptoj pse nuk ka një që brenda PS-së që ta qortojë këtë qasje.”, u shpreh Nano.
