“Në rast se do të përmbyset bota…”, Rama: Erdogani do t’i dalë garant vendit tonë

Kryeministri Rama deklaroi mbrëmjen e sotme në ‘Opinion’ se Turqia do të ofrojë ndihmën e saj për nevojat që do të ketë vendi nëse situata e krijuar nga koronavirusi del jashtë kontrollit. Rama tha se prej dy javësh ka folur me presidentin Erdogan duke marrë mbështetjen e garantuar nga ai në rast se Shqipëria do të ketë nevojë për një “Plan C”.

Pjesë nga biseda:

“Unë kam folur me Presidentin e Turqisë, me të cilin jam në kontakt të vazhdueshëm. Prej dy javësh ne kemi vendosur në tavolinën e shtetit turk alternativën, një listë me kërkesa, në rast se do të përmbyset bota dhe nuk do të ketë më asnjë mundësi komunikimi me askënd, për të kërkuar ato që thatë. Atë pjesën kritike, atë që duhet me e pas të garantuar për një “plan C”, duhet ta kemi të garantuar dhe e kemi të garantuar me Turqinë”, theksoi kryeministri Rama.