"Lumturo dhimbjen"/ Një sfilatë bamirësie për fëmijët e prekur nga kanceri

“Lumturo Dhimbjen” një sfilatë me një rëndësi të veçantë u organizua këtë të premte nga Brixhida Muça, ku paratë e përfituara nga shitja e veshjeve do të shkojnë në ndihmë të fëmijëve me kancer në spitalin “Nënë Tereza”.

Sfilatën e hapi vogëlushja Xhenna Masha, e cila sfiloi duke mbajtur simbolin e kancerit te fëmijët. Veshjet e përzgjedhura në këtë sfilatë ishin të shumëllojshme.

Ajo çfarë bie në sy, ndryshe nga sfilatat e tjera, është se nuk është një sfilatë e zakonshme por e një tjetër background-i, një sfilatë me gra dhe vajza të mbuluara, të cilat kanë zgjedhur të mbajnë shaminë si shoqëruesen më të bukur gjatë gjithë jetës dhe të jetojnë një jetë modeste.

Në një intervistë për “Fast News Albania” Brixhida thotë se qëllimi i kësaj sfilate është që të gjithë së bashku, të kontribuojmë për ti sjellë çaste të lumtura dhimbjeve fizike e shpirtërore të fëmijëve që vuajnë nga sëmundja e kancerit, pra mos ti braktisim por të i’u rrimë pranë në forma të ndryshme sipas mundësive që ka secili nga ne.

Brixhida Muça, organizuese e sfilatës “Lumturo Dhimbjen”

Fakti që të ardhurat e mbledhura do të shkojnë për bamirësi ja shtuan bukurinë kësaj sfilate. Kjo ishte shtysa pse ajo organizoi për të tretin vit rradhazi sfilatë bamirësie në ndihmë të këtyre fëmijëve. Brixhida pati mbështetjen e shumë profesionistëve shqiptarë, të cilët u ofruan të jepnin kontributin e tyre në realizimin e kësaj nisme.

Prania e studenteve të veshura me uniforma të profesioneve të ndryshme përçoi një mesazh të një rëndësie të veçantë.

Femrave të mbuluara nuk i’u ndalohet arsimimi, dhe për të ftuar shoqërinë të kuptojnë që gratë e mbuluara mund të integrohen në profesionet e tyre pa problem dhe të jenë një produkt pozitiv për shoqërinë. Eshtë e lirë të ketë një jetë sociale, të punojë, të bëjë punë vullnetare, të jetë e integruar në shoqëri. Më tej Brixhida shton se organizimi i këtij eventi ka qënë shumë emocionues, sepse dëshira për të i’u ardhur në ndihmë të tjerëve, për t’u bërë një faktor pozitiv në shoqëri ishte shumë e madhe.

Një detaj i veçantë i kësaj sfilate ishte pjesëmarrja e stilistëve dhe vajzave jo praktikante të fesë muslimane, modele të huaja dhe të fesë së krishterë të cilat patën shumë dëshirë të marrin pjesë për të shtrirë urat e bashkëpunimit, për të qënë më hapur dhe për të mos qënë një shoqëri e veçuar por një shoqëri e bashkëpunimit, humanizmit, dhe dashurisë së ndërsjelltë!