LIGJET E BIZNESIT
Edhe Shtetet e Bashkuara të Amerikës bëjnë pjesë në vendet më të prekura nga koronavirusi në botë, ku numri i viktimave ka arritur në rreth 2500 ndërsa të prekurit 140 mijë.
Presidenti Donald Trump tashmë ka marrë një vendim tjetër duke e zgjatur deri në 30 prill udhëzimet për distancimin social.
Ai theksoi se shpreson që vendi të rimëkëmbet pas 1 qershorit por piku i vdekjeve ka mundësi që të arrijë pas dy javësh.
Numri një i SHBA nuk harroi të hidhte akuza dhe në drejtim të spitaleve, duke pretenduar se ata po grumbullojnë respiratorë, për të cilët kërkesa është mjaft e madhe.
Trump u shpreh se spitalet duhet ti dorëzojnë të gjithë respiratorët në rast se nuk i përdorin.
Kujtojmë se vetëm pak ditë më parë presidenti Trump përdori fuqitë e emergjencës për t’i kërkuar firmës General Motors të prodhojë respiratorë për pacientët e koronavirusit, pasi e kishte akuzuar më parë këtë kompani se po harxhonte kohën me negociata. Dje, ai shprehu më tepër optimizëm për firmën General Motors, duke thënë se ajo po punon fort. Administrata e tij është nën presion për të shtuar prodhimin e respiratorëve, që janë me rëndësi kritike për të shpëtuar pacientët me komplikacione nga koronavirusi.
