LIGJET E BIZNESIT
Mjeku infeksionist Pëllumb Pipero ka folur për situatën e vështirë të krijuar nga koronavirusi në vend. Në një lidhje me “ABC News” mjeku Pipero theksoi se kjo sëmundje ka shumë të panjohura, rastet vijnë pa lajmëruar por pavarësisht kësaj janë marrë masat për ta pasur në qendër të vëmendjes.
“Kjo sëmundje ka pasur shumë të panjohura. Rastet e para ashtu si në botë, vijnë pa lajmëruar dhe duke mos pasur ansjë informacion ne ekspozohemi edhe pse epidemia ka qenë në qendër të vëmendjes tonë. As ne nuk i shpëtuam dot kësaj ndodhie, ne jemi të ekspozuarit e parë jemi heronjt e parë shpesh edhe dëshmorët e parë. Sa i takon dy mjekëve të konfirmuar pozitiv, gjëndja shëndetësore e tyre është e mirë. Janë të vetëizoluar”, u shpreh Pipero.
Në lidhje me numrin real të të prekurve nga virusi vdekjeprurës mjeku infeksionist tha:
“Nëse i referohemi studimeve e kam thënë se mbas çdo rasti të konfirmuar fshihen 10 raste apo 15 raste të tjera, të sigurta që janë. Në kushtet që jemi numri minimal i personave të prekur mendoj që janë mbi 400. Numrat janë statistikë dhe statistikat shërbejnë për tu studiuar më pas. Por ajo që qytetarët duhet të kenë kujdes të shtuar për ta përballuar me sa më pak humbje këtë epidemi. E gjithë vëmëndja jonë është për ta shtrirë në kohë epideminë, jo për ta ndaluar, bëhet fjalë për ta parandaluar dhe për ta bërë të parandalueshme. Të gjithë e pamë se asnjë vend në botë nuk i ka kapacitetet për ta përballuar këtë epidemi.”
