Helmimi i gjimnazistëve në Fier/ Policia nis hetimet ndaj 2 nxënësve, ja çfarë hodhën

Një ngjarje e rëndë ndodhi dje në gjimnazin “Janaq Kilica” të Fierit.

Për herë të dytë brenda pak ditësh, nxënësit e kësaj shkolle u helmuan masivisht dhe mbi 30 prej tyre u dërguan në spital me bllokim frymëmarrje, të vjella dhe marrje mendsh.

Pas trajtimit mjekësor, gjendja e tyre u stabilizua dhe u larguan për në banesë.

Ndërkohë policia bën me dije sot se janë proceduar penalisht dy 15-vjeçarët A.M. dhe A.H.

Dyshohet se të dy këta nxënës hodhën në ambientet e brendshme të shkollës së mesme sprajt me lëndë gazi, shkaktuar helmimin e 58 nxënësve të tjerë dhe të 2 mësuesve.

Ata akuzohen për veprat penale ndotja e ajrit dhe prishje të qetësisë publike.

NJOFTIMI ZYRTAR I POLICISE

Procedohen penalisht 2 nxënës të shkollës së mesme në Fier, të cilët dyshohen se kanë përdorur sprajt me lëndë gazi, në ambientet e brendshme të shkollës.

Specialistët për Hetimin e Krimeve në Komisariatin e Policisë Fier, nën drejtimin e Prokurorisë Fier, zbardhën ngjarjen e ndodhur ditën e djeshme, ku si pasojë e përdorimit të një sprajti me lëndë gazi, në ambientet e brendshme të shkollës, disa nxënës shfaqën shqetësime me frymëmarrjen dhe pasi morën ndihmën e parë në Spitalin Rajonal Fier, u larguan për në banesë.

Në përfundim të veprimeve hetimore rezultoi se sprajti ishte përdorur nga 2 nxënës të kësaj shkolle, konkretisht A. M., 15 vjeç dhe A. H., 15 vjeç, të cilët u proceduan penalisht.

Materialet i kaluan Prokurorisë pranë Gjykatës së Shkallës së Parë Fier, për veprat penale “Ndotja e ajrit” dhe “Prishja e qetësisë publike”.