Në lidhje me situatën e krijuar në Shqipëri, pasi u konfirmuan tashmë dy rastet e para të prekura me koronavirus, Autoriteti i Aviacionit Civil ka dhënë një njoftim të rëndësishëm për të gjithë personat që duan të udhëtojnë drejt Italisë.
Aty thuhet se në Itali janë 10 aeroporte të cilat nuk lejojnë udhëtime hyrëse pasi janë në zonën e kuqe dhe se duhen shmangur.
Kështu, bëhet me dije se këto aeroporte që janë mbyllur janë: Malpensa; Bergamo; Bologna; Firenze; Genoa; Perugia; Pisa; Rimini; Venezia dhe Verona.
NJOFTIMI
Në vijim të situatës së krijuar në Itali për shkak të përhapjes së COVID-19, masave të marra nga qeveria italiane për vendosjen e karantinës në veri të Italisë, si dhe masave parandaluese të përhapjes së virusit në vendin tonë, në zbatim të urdhrit të Ministrisë së Infrastrukturës dhe Energjisë, ndalohen të gjitha fluturimet për dhe nga Aeroporti Ndërkombëtar “Nënë Tereza” dhe: Aeroporti Milano Malpensa (MXP); Aeroporti Milano Bergamo (BGY); Aeroporti Bologna (BLQ); Aeroporti Firenze (FLR); Aeroporti Genoa (GOA); Aeroporti Perugia (PEG); Aeroporti Pisa (PSA); Aeroporti Rimini (RMI); Aeroporti Venezia (VCE) dhe Aeroporti Verona (VRN)
Autoriteti Aviacionit Civil ka lëshuar menjëherë udhëzimin drejtuar Aeroportit Ndërkombëtar “Nënë Tereza” dhe ofruesit të shërbimit të lundrimit ajror “Albcontrol” për nxjerrjen e njoftimeve të nevojshme për zbatimin e këtij kufizimi të fluturimeve për/nga aeroportet e lartpërmendura, deri në një njoftim të dytë.
