Edi Reja: Në Bergamo nuk ka as dhoma për të infektuarit apo për të vdekurit, qava sot në mëngjes kur pashë video-n e..

Trajneri i Shqipërisë Edi Reja rrëfen se situata në qytetin e Bergamos ku ai jeton është bërë me të vërtetë kritike. Për “Radio Kiss Kiss Napoli”, tekniku 74-vjeçar italian lutet që gjendja e rëndë e krijuar në veri të Italisë të mos përhapet në jug të vendit, pasi për shkak të vështirësive ekonomike, rajoni jugor e ka të pamundur të marrë përsipër trajtimin dhe mjekimin e të gjithë pacientëve.

Duke folur për kampionatin italian, Reja rrëfen se është prekur nga një video e dërguar, e cila lidhej me fitoren e Napolit (në kohën kur e drejtonte) kundër Interit. Italiani është njëri prej figurave më të respektuara në klubin napolitan.

“Gjendja në Bergamo – Jam në karantinë në shtëpinë time, nuk bëjmë shaka me gjëra të tilla. Duhet të ndalojmë çdo lloj aktiviteti, përndryshe nuk do ta ndalim dot virusin. Në Bergamo situata është tragjike, është një katastrofë e vërtetë. Po bëjmë një luftë. Qëndrojmë në shtëpi dhe nëse dalim jashtë lëvizim me maska dhe doreza. Bëjmë pazar kur kemi nevojë. Uroj që ai rrezik në veri të mos mbërrijë në jug. Strukturat dhe autoritetet në jug nuk mund të marrin përsipër të gjithë të infektuarit. Ka infermiere të infektuar dhe s’ndodhet asnjë dhomë për të infektuarit apo për të vdekur.

Kampionati italian – Do të jetë shumë e vështirë të fillojë kampionati në maj. Uroj që nga fundi i muajit kjo karantinë të sjellë rezultatet e shumëpritura. Uroj që të luajmë sërish, por duket e pamundur. Sot në mëngjes mora një video në kohën kur kemi luajtur në kampionat kundër Interit me Napolin dhe pashë fytyrën fëminore të Hamshikut dhe golin e Zalajetës. Në sfond ishte kënga e Pino Danieles. Më dolën lot dhe u preka. I falenderoj të gjithë napolitanët. Qëndroni në shtëpi, ju dua!”, përfundoi  prononcimin e tij trajneri i Shqipërisë Edi Reja./Panoramasport