LIGJET E BIZNESIT
Kryeministri Edi Rama u shpreh sot në Komitetin Kombëtar të Sigurisë se situata nga koronavirusi tashmë ka arritur të mbërthejë gjithë botën duke e zënë atë në befasi.
Ndër të tjera Rama ka deklaruar se shqiptarët janë prekur dhe nga infodemia, përhapja e lajmeve të rreme, dhe këtë frikë duhet ta përballojnë me shumë besim dhe mos dëgjojnë lajme apo të lexojnë në internet, por duke iu drejtuar mesazheve të librave të shenjtë dhe Papa Françeskut.
“Një virus përhapja e të cilit për fat të keq dhe kjo është e pashmangshme dhe problematike po shoqërohet me atë që OBSH e quan infodeminë, lajmet e pakonfirmuara, të rreme, që marrin dhenë dhe influencojnë mbi qëndrimin dhe sjelljen e konsumatorëve të lajmeve.
Këtë situatë duhet ta përballojmë me shumë besim. Ndaj ju sugjeroj të mbyllni televizorët, të fikni telefonat dhe ti drejtoheni mesazheve të Papa Françeskut apo Kuranit e Biblës se sa të humbisni kohë me lloj- lloj marrëzish e poshtërsish që njerëz me ligësi shpirtërore shpërndajnë duke bërë atë që është çnjerëziore dhe nga pikëpamja profesionale e padobishme”.
“Por sic ndodh shpesh tek ne, situata është shfaqur në më shumë se sa një formë, rendja e ethshme për më shumë informacion përmes klikimeve që sjell shumëfishim të titujve që përmbajnë fjalën koronavirus apo viktimë, por nga ana tjetër një karakteristikë jo fort e përhapur është përpjekja individuale apo e grupeve të caktuara për të shfrytëzuar frikën, për të nxitur panikun, për të prodhuar alarme të vazhdueshme për interesa mizerabël politike e mediatike”, deklaroi kryeministri gjatë fjalës së tij.
