Qytetarët italianë kanë denoncuar mashtrimin që po iu bëhet në këto momente kritike, kur një pjesë e vendit është prekur nga koronavirusi.
Paniku i qytetarëve nga mundësia e infektimit me koronavirusin vdekjeprurës, ka bërë që çmimet e produkteve higjieno-sanitare të shumëfishohet në Itali. Italianët i kanë boshatisur raftet e farmacive, duke bërë që pjesa e mbetur e qytetarëve t’i drejtohen platformave të blerjeve online.
Pas një monitorimi konstant prej disa ditësh, Enti Italian për mbrojtjen e të drejtave të Konsumatorëve, Codacons ka denoncuar se çmimi i shitjes online të një maske është rritur me 1700%. Konfeksioni me 5 maska shitet 189 euro online, kur dikur çmimi i një maske ishte vetëm 0.10 cent.
Shumëfishim të çmimit kanë pësuar dhe produktet higjeno-sanitare si ‘Amuchina’ e njohur si një disinfektant mjaft i fortë. Çmimi i këtij produkti 80 ml që deri më tani shitej me 3 euro, sot shitet në çmimin 22.5 euro, transmeton Ora News.
Enti Italian për mbrojtjen e së drejtës së konsumatorëve ka informuar se ka dorëzuar zyrtarisht një denoncim në Prokurorinë e Romës dhe tek autoritetet e ‘Guardia di Finanza’ spekulimet që po bëhen me çmimet e këtyre produkteve.
