Një ditë më parë vizitoi besimtarët në Itali, sëmuret Papa Francesku

Papa Francesku ka anuluar takimin në bazilikën San Giovanni i cili do të zhvillohej mëngjesin e sotëm, pasi është i sëmurë.

Në një njoftim të Vatikanit thuhet se ka një të ftohtë të lehtë, duke bërë me dije se takimet e tjera do të zhvillohen si normalisht. “Papa nuk do të shkojë në Bazilikën Romake të San Giovanni në Laterano këtë mëngjes. Ka një të ftohtë të lehtë kështu që preferoi të qëndrojë në zonat afër Santa Marta. Takimet e tjera zhvillohen rregullisht”, thuhet në njoftim.

Nga ana tjetër mediat kanë nisur të aludojnë se Papa Francesku u sëmurë pasi një ditë më parë takoi disa besimtar në Sheshin Shën Pjetër, ku pati kontakt fizikë me ta dhe gjasat e prekjes nga koronavirusi nuk përjashtohen.

Kujtojmë që Italia ndodhet në një situatë emergjente, ku virusi është i shpërndarë në disa provinca. Deri më tani raportohen 500 të infektuar dhe kanë humbur jetën 14 persona.

Ndryshe nga shtetet e tjera, në Itali janë prekur edhe fëmijë në zonën e Lombardisë e cila është edhe vatra e shpërthimit në këtë shtet.