Ditën e sotme presidenti Ilir Meta nuk e ka ndalur “luftën” e tij ndaj kreut të KED Ardian Dvorani.
Kreu i Shtetit ka depozituar një padi shtesë për Dvoranin.
Më pas Meta ka publikuar kallëzimin në rrjetet sociale dhe shkruan se prova dhe fakte të reja do të dalin shumë shpejt në dritë.
“Të dashur qytetarë, Pasi u njoha me provat e reja tronditëse të angazhimit të tij në grushtin e shtetit, sapo kam firmosur shtesën në kallëzimin penal ndaj z.Ardian Dvorani. Fakte të reja pritet të dalin në dritë edhe për persona të tjerë të implikuar në grushtin e shtetit, të cilët nuk do munden t’i shmangen përgjegjësisë për konsumimin e veprave të rënda penale. Ju garantoj se GRUSHTI I SHTETIT DO SHPARTALLOHET NË MËNYRËN MË SHEMBULLORE!”, shkruan Meta.
Ndërkohë në kallëzimin e bërë në SPAK, Meta shkruan se Dvorani në mënyrë manipulative, ka përdorur shkresën e Presidentit për të keqinformuar Kuvendin. Një akuzë tjetër është që Ardian Dvorani me dashje direkte, ka shkelur çdo parashikim ligjore dhe ka thyer këtë rregull të Këshillit, për t`iu përgjigjur kërkesës së Kuvendit.
PJESË NGA KALLËZIMI
Sa më sipër, i kallëzuari Ardian Dvorani, në mënyrë manipulative, referon shkresën e Presidentit të Republikës, vetëm për të keqorientuar Kuvendin në përllogaritjen e një afati 30 ditor brenda të cilit duhet të shprehej sipas tij Presidenti i Republikës (afat ky ligjor dhe jo kushtetues), dhe për të kryer konstatimin se ky afat kishte kaluar, ndërkohë që një konstatim i tillë nuk është tagër as i vetë Këshillit të Emërimeve në Drejtësi, jo më i Kryetarit të këtij Këshilli. Ky veprim është kryer me qëllimin e pastër të rrëmbimit të funksioneve të Presidentit të Republikës në emërimin e anëtarit të Gjykatës Kushtetuese dhe kurrsesi nuk mund të justifikohet me mungesën e tij të njohurive apo faktin se “kështu e kuptoj unë Kushtetutën”.
Kjo për shkak se, kjo shkresë e Ardian Dvoranit ka dalë vetëm një ditë pas mbledhjes së Këshillit të Emërimeve në Drejtësi, mbledhje kjo e realizuar në datën 7 nëntor 2019. Pra Këshilli, vetëm 1 ditë më parë, në mbledhjen e datës 7 nëntor 2019, vërtetuar dhe nga procesverbali i kësaj mbledhje, dakordësoi se nuk mund të komentonte qëndrimin e Presidentit të Republikës, pasi do të përbënte tejkalim kompetencash. Ndërkohë që i kallëzuari Ardian Dvorani me dashje direkte, ka shkelur çdo parashikim ligjore dhe ka thyer këtë rregull të Këshillit, për t`iu përgjigjur kërkesës së Kuvendit, si më poshtë sqarohet.
