Vijojnë të dalin detaje nga arrestimi i pronarit të Universitetit Europian të Tiranës, analistit dhe botuesit Henri Çili.
Sipas informacioneve, ai ka rënë në pranga për llogari të policisë së Gjirokastrës dhe akuzohet për korrupsion te organeve të drejtësisë.
Së bashku me Çilin janë arrestuar dhe 7 persona të tjerë, si edhe avokati i tij Ilir Korbi.
Ka qenë prokuroria e Përmetit që e ka lëshuar këtë urdhër-arresti.
Dyshohet se të akuzuarit ndikonin për të liruar anëtarët e bandës së Lazaratit.
Henri Cili ka rezultuar në përgjime, që ka ndërhyrë te një gjyqtar për të liruar dy të burgosur që ranë në pranga në Lazarat.
Ata janë dy vëllezërit Aliko, që ndodhen në burg për vrasjen e efektivit Ibrahim Basha gjatë një aksioni zë zhvilluar në Lazarat në 2015, për goditjen e lëndëve narkotike.
Dyshohet se Henri Çili është kapur në bisedime me babain e vëllezërve, të cilëve iu ka premtuar lirim në këmbim të një shumë të madhe parash.
Aksioni i policisë për arrestimin e Çilit ka nisur që dje pas mesnatës, dhe fillimisht ai është mbajtur në Drejtorinë e Policisë së Tiranës dhe më pas është dërguar në atë të Gjirokastrës.
Procedimi ka nisur që në shtator 2019, për akuza si ushtrim i paligjshëm i ndikimit te organet e drejtësisë, mashtrim, falsifikim, pastrim parash.
Ndërkohë policia pritet të dalë me një deklaratë zyrtarë në lidhje me atë që ka ndodhur.
