Policia ka arrestuar pronarin e Universitetit Europian të Tiranës, botuesin Henri Çili.
Aksioni ka ardhur për llogari të Gjykatës së Gjirokastrës, pasi Çili bashkë me një bashkëpunëtor të tijin, emri i të cilit ende nuk dihet, janë arrestuar dhe transferuar nën forca të shumta policie drejt qytetit jugor.
Gjithashtu gjatë natës janë ushtruar dhe shumë kontrolle ku policia ka rrethuar dhe godinën e Universitetit Europian të Tiranës.
Arsyeja e arrestimit ende nuk bëhet e ditur, por dyshohet se urdhër arresti është lëshuar për shkak të një kallëzimi për ndërhyrje te një gjyqtar për lirimin e një të burgosuri.
Henri Çili është arrestuar së bashku me 7 persona të tjerë, pasi akuzohen për korrupsion pasiv dhe aktiv në drejtësi.
Dyshohet se Çili paguante gjyqtarë për të nxjerrë nga burgu bandën e Lazaratit.
Tashmë ai është transferuar drejt Gjirokastrës ku po mbahet në dhomat e izolimit në Policinë Vendore të qytetit.
Pritet që policia të dalë me një njoftim zyrtar në lidhje me këtë aksion.
