Alarmi nga koronavirusi ‘mbërthen’ Italinë, shtyhen edhe 3 ndeshje të Serisë A

Duket se alarmi për koronavirusin në Itali, sa vjen e përhapet më shumë.

Pas vdekjes të dy personave dhe 79 të tjerë të prekurve, ministria italiane e Sportit ka bërë me dije se do të anulohen gjithashtu edhe disa aktivitete sportive në Veneto dhe Lombardi, të cilat ishin planifikuar për sot.

Kështu, mësohet se në serinë A, janë shtyre ndeshjet Atalanta-Sassuolo, Verona-Cagliari dhe përballja e së dielës e planifikuar në San Siro midis Interit dhe Sampdorias.

Në një letër dërguar presidentit të CONI-t, Giovanni Malagò, i kërkohet numrit një të sportit italian “të përçojë vendimin në të gjitha organet sportive kompetente të ftesës së qeverisë për të pezulluar të gjitha ngjarjet sportive të të gjitha niveleve dhe disiplinave të parashikuara në rajonet e Lombardisë dhe Venetos për të dielën 23 shkurt 2020”.

“Qeveria po përgatitet të nxjerrë masa urgjente për të trajtuar dhe përmbajtur rastet e infektimit nga koronavirusi, – thuhet në letrën drejtuar Malagòs. – Këto masa përfshijnë gjithashtu botën e sportit për nevojën për të parandaluar rreziqet dhe për të mbrojtur më mirë shëndetin e të gjithë atyre që, në kapacitete të ndryshme, marrin pjesë në ngjarje dhe gara”.