Policia e Tiranës ka arrestuar disa orë pas krimit të rëndë që tronditi Paskuqanin, autorin Erdet Çapoku.
Burime nga policia konfirmojnë se ai është arrestuar te karburanti me kupolë në zonën e Laprakës në kryeqytet.
Autori ishte duke lëvizur me bicikletë dhe është arrestuar nga shërbimet e komisariatit nr.4.
Kujtojmë se i riu ia mbathi menjëherë pas krimit nga shtëpia në Paskuqan ku la të vdekur kunatën e tij Enkeleda Çapoku, pasi e kishte qëlluar me levë dhe masakruar me thikë.
NJOFTIMI ZYRTAR I POLICISE
Kapet në kohë rekord autori i vrasjes së shtetases E. Ç., ndodhur në Paskuqan, në orët e vona të mbrëmjes së djeshme.
Menjëherë pas ngjarjes, strukturat e DVP Tiranë organizuan punën për lokalizimin dhe kapjen e shtetasit Erdet Çapoku., i cili pasi ka goditur me sende të forta kunatën është larguar nga vendngjarja.
Falë angazhimit maksimal dhe informacioneve të marra nga qytetarët, shërbimet e Komisariatit të Policisë Nr. 4 bënë të mundur lokalizimin dhe kapjen e këtij shtetasi, në Laprakë.
Shtetasi ndodhet i shoqëruar në Polici, për veprime të mëtejshme.
