Ka nisur në Gjykatën e Tiranës seanca e vlerësimit të masës së sigurisë për të arrestuarit e rrëmbimit dhe vrasjes së 49-vjecarit Jan Prenga në zonën e Kamzës më 17 janar.
Të arrestuarit kanë dalë në sallën e gjyqit të përfaqësuar nga avokatë të cilët i kanë zgjedhur vetë, ndërkohë që gjyqtari që do të shqyrtojë kërkesën është Sokol Toma.
Ndërkohë kanë dalë dhe fotot e të arrestuarve.
Sipas relatimit të Gjykatës, Leonard Hajri,Olsi Turja, Elton Hajri dhe Bajram Hajri akuzohen për “Mbajtje peng personi” dhe “Armëmbajtje pa leje” ndërsa Festim Beçdili për “Fshehje dhe asgjësim të kufomës”.
Aktualisht sipas informacioneve senaca po zhvillohet me dyer të mbyllura për shkak të sekretit hetimor.
Kujtojmë se përpara tri ditësh, Policia e Shtetit njoftoi zyrtarisht se kishte zbardhur pengmarrjen e Jan Prengës, ngjarje e ndodhur më 17 janar në Kamzë, i cili dyshohet se është dhunuar për vdekje nga autorët, por trupi i tij ende nuk është gjetur.
Katër persona u arrestuan gjatë operacionit të së hënës, që forcat RENEA zhvilluan në rrethinat e Shijakut, mes të cilëve edhe babai e vëllai i Altin Hajrit, i cili konsiderohet si kreu i grupit.
Në kuadër të operacionit të koduar “Resorti”, ditën e hënë, u bë e mundur kapja dhe ndalimi i shtetasve: Leonard Hajri, 35 vjeç, i dënuar më parë, Olsi Tarja, 36 vjeç, Elton Hajri, 32 vjeç dhe Bajram Hajri, 64 vjeç, banues në Shijak.
Policia sekuestroi 2 armë zjarri pistoleta, një sasi municioni, 16 aparate celularë, 4 automjete dhe një shumë eurosh. Policia tha se nga veprimet e thelluara hetimore ka rezultuar se personat, pas rrëmbimit të shtetasit Jan Prenga, kanë shkuar direkt në resortin në pronësi të shtetasit Altin Hajri, i shpallur në kërkim.
Ndërsa mbrëmjen e së martës, Forcat Operacionale arrestuan në Kavajë Festim Bexhdilin, 30 vjeç. Ky i fundit dyshohet se ka bashkëpunuar në fshehjen e trupit të 48-vjeçarit Prenga, pasi ka vdekur gjatë torturave.
