Ndodh në Dibër/ Shikoni se si ky ‘skifter’ vjedh portofolin në dyqan me qetësinë më të madhe (VIDEO)

Policia e Dibrës ka vënë në pranga sot një 26-vjeçar, me iniciale J.B.

I riu akuzohet se ka kryer vjedhje banesash dhe lokalësh në Peshkopi.

Sipas njoftimit zyrtar të uniformave blu, 26-vjeçari ka grabitur orendi shtëpiake në një banesë dhe 15.000 lekë në një dyqan.

Gjithashtu kanë dalë dhe pamjet e kamerave të sigurisë, ku shfaqet i riu duke marrë portofolin me para.

NJOFTIMI ZYRTAR I POLICISE

Vijon puna për parandalimin e vjedhjeve, zbardhjen e atyre të ndodhura më parë, si dhe për kapjen dhe arrestimin e autorëve. Zbardhen 2 vjedhje të ndodhura më parë, arrestohet në flagrancë 26-vjeçari.

Në vijim të punës për parandalimin e vjedhjeve, zbardhjen e atyre të ndodhura më parë, si dhe për kapjen dhe arrestimin e autorëve, shërbimet e Komisariatit të Policisë Dibër, mbi bazën e informacioneve të grumbulluara për një shtetas që dyshohej se kryente vjedhje banesash dhe lokalesh në qytetin e Peshkopisë, kanë organizuar punën duke bërë të mundur kapjen dhe arrestimin e tij.

Si rezultat i punës së mirëorganizuar u bë arrestimi në flagrancë i shtetasit J. B., 26 vjeç, banues në Dibër. Në vijim të hetimeve, bazuar edhe në provat e grumbulluara, dyshohet se ky shtetas ka vjedhur orendi shtëpiake në një banesë dhe 15.000 lekë në një dyqan në qytetin e Peshkopisë.

Vijon puna edhe për dokumentimin e disa vjedhjeve të tjera që dyshohet se janë kryer nga ky shtetas. Materialet procedurale do t’i referohen Prokurorisë Dibër, për veprime të mëtejshme.