LIGJET E BIZNESIT
Kryeministri Edi Rama ka vizituar mesditën e sotme banesën e re të familjes së Halil Sulës, të cilëve iu shkatërrua shtëpia nga tërmeti i fuqishëm që goditi Shqipërinë më 26 nëntor.
Gjatë kohës që u ul duke biseduar me anëtarët e familjes, Rama u shpreh se po bëhen të gjitha përpjekjet që të mbarojë ndërtimi i banesave të reja dhe së shpejti do të shkojë në Bruksel dhe Gjermani për të lobuar në lidhje me marrjen e fondeve.
“Ka qenë goditje e madhe dhe ishte dëm shumë i madh. Por i kemi marrë masat dhe do shkojmë në Gjermani, Bruksel, sot vjen Presidenti i Këshillimit është që po bëjmë çmos të mbarojmë me shpejtësi këtë punë,”- u shpreh kryeministri.
Kreu i qeverisë deklaroi ndër të tjera se tërmeti ka mbaruar për pjesën më të madhe të njerezve, dhe se jeta normale ka filluar, edhe pse fjalët në kazan kanë filluar sipas tij, ku dita nis e mbaron me tërmet.
“Tërmeti ka mbaruar për pjesën më të madhe të njerëzve ka filluar jeta normale. Ka filluar prapë llafet e kazanit por për mua fillon dita tërmet dhe mbaron tërmet. Me këtë punë që është prioriteti kryesor. Çdo ditë kemi një takim për tërmetin dhe gjatë darkës një takim po për tërmetin. Dhe ideja është të kthehen të gjithë në shtëpi më të mira sesa i kishin”, tha Rama.
Por në këtë vizitë nuk kanë munguar as batutat për të cilat kryeministri shquhet.
Ai ka pikasur karamelet Zana në tavolinë, tipike për kohën e diktaturës dhe ka kujtuar sesi mori njëherë kur ishte nxënës në Lice, notën në sjellje pasi shkroi një vjershë të degjeneruar për kohën.
“Karamelet Zana kanë dalë prapë. Më kanë thyer notë në sjellje kur isha në Lice, bëra një vjershë për karamelet Zana, por ishte vjershë e degjeneruar për kohën,”- u kthye Rama pas në kohë.
