“Jemi seriozisht të ekspozuar” Meta bën thirrjen e fortë për koronavirusin: Mund të ketë pasoja kritike

Në kuadër të ngritjes së alarmit nga koronavirusi kinez dhe shpalljes së emergjencës ndërkombëtare nga ana e Organizatës Botërore të Shëndetësisë, presidenti Ilir Meta e ka nisur ditën me një thirrje të fortë.

Ai ka kërkuar marrjen e masave më të forta për të parandaluar hyrjen e këtij virusi të rrezikshëm në Shqipëri.

Në një prononcim përpara gazetarëve, ai është shprehur se jemi seriozisht të ekspotuar dhe se duhet parandaluar depërtimi i virusit në vendin tonë.

DEKLARATA E METES

Mendoj se pas shpalljes së gjendjes së emergjencës globale nga OBSH duhen marrë masat më të forta të mundshme, sanitare dhe epidemiologjike për të parandaluar këtë virus për të penetruar në vendin tonë. Aq më tepër kur janë konstatuar dy raste në Italinë fqinje.

Është koha për të marrë masat më të forta, Shqipëria ka një eksperiencë si parandalimi i suksesshëm i SARS dikur, por është e rëndësishme të theksohet se cdo nënvleftësim mund të jetë me pasoja kritike, inkurajoj masat më të forta parandaluese

Jemi ne një proces komunikimi, rastet në Itali dhe një rast në një vend tjetër fqinj e tregojnë qartë se jemi seriozisht të ekspozuar dhe duhet të parandalojmë me cdo kusht dhe mjet depërtimin  virusit në vendin tonë