Pas vendimit të Gjykatës së Tiranës për të pushuar çështjen ndaj kryedemokratit Lulzim Basha, dhe dy ish-zyrtarëve Arben Ristani dhe Ilir Dervisi, ka reaguar kreu i Grupit Parlamentar të PS-së Taulant Balla.
Basha, Ristani dhe Dervishi akuzoheshin nga prokuroria për “falsifikim dokumentesh” lidhur me kontratat e lobimit me vlerë 675 mijë euro në SHBA në zgjedhjet e vitit 2017.
Balla duket i revoltuar në reagimin e tij, dhe bën me faj “prokurorin dhe gjyqtarin që nuk e ka kaluar vettingun”. Balla thotë se kjo çështje nuk mund të mbyllet kështu ndaj, rikthimi i çështjes për hetim të plotë dhe apelimi janë e vetmja rrugë sipas tij.
“Këshilli i Lartë i Gjyqësorit dhe Këshilli i Lartë i Prokurorisë duhet të hetojnë gabimet procedurale me dashje, që çuan në këtë teatër të turpshëm, ku prokuroria hetoi 2 vite dhe gjykata e mbylli për 2 orë”, thotë Balla.
Reagimi i plotë:
Kush mendon se kjo dosje e rëndë me të pandehur kryesor Lulzim Bashën, mund të mbyllet kështu pa u hetuar aspak në themel, pa u marrë në pyetje të gjithë personat e përfshirë, e ka shumë gabim.
Kjo nuk është një çështje vetëm e drejtësisë shqiptare.
Nxitimi i stimuluar i ndonjë prokurori dhe gjyqtari që nuk e ka kaluar procesin e vettingut dhe që zbaton parimin “kap çfar të kapësh”, shfaqën sot këtë teatër të turpshëm për sytë e shqiptarëve dhe jo vetëm.
Këshilli i Lartë i Gjyqësorit dhe Këshilli i Lartë i Prokurorisë duhet të hetojnë gabimet procedurale me dashje, që çuan në këtë teatër të turpshëm, ku prokuroria hetoi 2 vite dhe gjykata e mbylli për 2 orë.
Apelimi i këtij vendimi absurd dhe rikthimi i çështjes për hetim të plotë duke dhënë edhe garancitë nga Gjykata për marrjen në pyetje të përfituesit të parave Nik Muzin, janë hapat e vetëm për të hedhur dritë e për të bërë drejtësi në këtë dosje të rëndë.
