LIGJET E BIZNESIT
Pasi Bashkia e Dibrës ka nderuar ditën e sotme me titullin “Nderi i Qarkut Dibër” ish-kreun e presidiumit të Kuvendit Popullor Haxhi Lleshin, ka reaguar edhe kryetari i sapozgjedhur i Institutit për Studimin e Krimeve të Komunizmit në Shqipëri Çelo Hoxha.
Ai shprehet se Haxhi Lleshi ka kryer krime gjatë periudhës së komunizmit. Ai shton se Lleshi ka firmosur ekzekutimin e të dënuarve politikë.
Dhënia e titullit nderi i qarkut Dibër për ish Kryetarin e presidiumit të kuvendit Popullor Haxhi Lleshi ka ngjallur indinjatë tek ish të persekutuarit gjatë regjimit komunist. Celo Hoxha, i sapozgjedhur në krye të Institutit për Studimin e Krimeve të Komunizmit në Shqipëri, thotë se vendimarrja lokale bie në kundërshti me ligjet në fuqi që dënojnë krimet e komunizmit. Sipas tij Haxhi Lleshi është firmëtar i të gjitha vrasjeve politike të ndodhura nga viti 1953 e derisa drejtoi Presidencën e Kuvendit Popullor.
Në intervistën e dhënë për News 24, Hoxha analizon domosdoshmërinë e miratimit të dy ligjeve nga parlamenti shqiptar, ligjit të Lustracionit dhe Dekomuntizimit. Sipas tij dy ligjet e munguara për 30 vite do t’i prisnin rrugën glorifikimit të personave që kanë kryer krime gjatë diktaturës si dhe qëndrimit të tyre në pushtet.
