LIGJET E BIZNESIT
Tërmeti i fuqishëm i 26 nëntorit që goditi Shqipërinë, përveç se mori 51 jetë njerëzish dhe la pas mbi 900 të plagosur, ka shkaktuar edhe shumë dëme në banesa.
Shtëpitë që morën më shumë dëme ishin kryesisht në Durrës, ku banorët e shqetësuar vendosën të linin menjëherë apartamentet e tyre të rrezikuar duke u shpërngulur diku tjetër.
Mirëpo ky veprim i tyre, mesa duket vuri në lëvizje edhe hajdutët, të cilët nuk ngurruan të përfitojnë nga kjo situatë.
Ata nuk kanë humbur kohë, por janë sulur në banesat e shkretuara për të marrë atë çfarë kanë lënë banorët.
Rasti më i fundit ka ndodhur në Golem, ku ‘skifterët’ kanë bërë kërdinë në mbi 20 apartamente.
Ata kanë vjedhur çfarë kanë gjetur përpara, pajisje elektroshtëpiake, soba me dru, soba elektrike, madje edhe grupet e dushit në banjë.
Kjo tregon se ata kanë patur shumë kohë në dispozicion për të kryer aktin e vjedhjes edhe se kanë qenë të qetë në punën e tyre.
Banorët e ketyre apartamenteve, përveç faktit që kanë lënë tashmë banesat, duhet të përballen edhe me boshatisjen e tyre nga hajdutët.
Ata kanë dërguar edhe fotot në redaksinë e Fastnewsalbania, duke u shprehur të shqetësuar për atë që ju ka ndodhur.
Policia është njoftuar për situatën në fjalë, dhe kanë mbërritur menjëherë në vendngjarje, ku dhe po punohet për zbardhjen e rrethanave dhe identifikimin e autorëve të grabitjes./ Fastnewsalbania.
