Si e mori ‘në qafë’ përplasja me Ballukun/ 3 akuzat që rëndojnë mbi Kajmakun, kush është prokurori që firmosi arrestimin e tij

Ditën e sotme prokuroria ka lëshuar urdhër-arrest për ish-kryetarin e Bashkisë Vorë Agim Kajmakun.

Ky veprim erdhi pak ditë pasi atij iu hoq mandate nga Komisioni Qendror i Zgjedhjeve për shkak se kishte gënjyer në formularin e dekriminalizimit të paraqitur pranë këtij institucioni.

Policia e ka shpallur në kërkim Kajmakun pasi ky i fundit nuk është gjetur as në banesën e tij pas kontrolleve të bëra.

Mësohet se janë tre akuza që rëndojnë mbi të : Shpërdorim detyre, falsifikim formularësh dhe ushtrim të funksioneve pas dhënies fund të detyrës.

’Prokuroria e Rrethit Gjyqesor Tirane, ka shpallur ne kerkim me mase sigurimi me arrest ne burg, ne lidhje me hetimin qe zhvillohet ne ngarkim te shtetasit Agim Kajmaku, i dyshuar per kryerjen e veprave penale, Shperdorim detyre, sipas nenit 248 te Kodit Penal, fallsifikimi i formulareve, neni 190 i Kodit Penal, dhe Ushtrimi i funksioneve pas dhenies fund te detyres, neni 249 i Kodit Penal”, thuhet në njoftimin e Prokurorisë.

Nga ana tjetër prokurori që ka firmosur urdhër-arrestin për Agim Kajmakun është Kolë Hysenaj, po i njëjti prokurorqë refuzoi pak ditë më parë përfundimin e hetimeve për lobimin rus të kryetarit të PD Lulzim Basha.

Si ndodhi përplasja Kajmaku-Balluku?

Vora u kthye dhe në një arenë përplasjesh brenda vetë klaneve në PS, ku ministrja Belinda Balluku kërkoi që të vendoste në krye të Bashkisë Laureta Omerin, një nga nënkryetaret e saj të besuara, të cilën Kajmaku e shkarkoi ditën e fundit të qendrimit të tij në detyrë.

Përpara se KQZ ta shkarkonte, Kajmaku ka shkuar në zyrën e tij, dhe ka shkarkuar dy nënkryetarët e bashkisë: Muca dhe Laureta Omeri.

Në vend të tyre, ka emëruar vetëm një nënkryetar bashkie, shefin e tij të kabinetit, Gent Picari, dhe pikërisht ky veprim i tij ka shtuar dhe një akuzë siç është ajo e ushtrimit të funksioneve pas dhënies fund të detyrës.

Në këto kushte, Këshilli bashkiak është i detyruar ta caktojë Picarin, të besuarin e Kajmakut, në krye të bashkisë.

Nga ana tjetër zgjedhjet në Bashkinë e Vorës mbahen peng nga ana e presidentit Meta, i cili njësoj si në rastin e Shkodrës nuk ka dekretuar një datë të re për mbajtjen e tyre, pasi nuk i njeh votimet e 30 Qershorit, nga ku doli kryetar dhe Kajmaku.