‘Rama të japë shembullin i pari’ thirrja e Maliqit: Pagat e deputetëve të shkojnë për të prekurit nga tërmeti

Deputeti Lefter Maliqi ka vizituar sot nga afër zonat e prekura nga tërmeti në Durrës.

Ai ka bërë thirrje që të mblidhet parlamenti dhe të ndryshojë buxhetin për të akorduar fonde për strehimin dhe financimin e secilit të dëmtuar nga lëkundja e fuqishme.

Maliqi shton se kryeministria ka parashikuar buxhetin e vet 2 fishin e vitit të kaluar për portalet, luksin , dietat dhe bën apel që kryeministri Edi Rama të japë shembull nga vetja.

“Parlamenti të mblidhet urgjent për këto ndryshime dhe të filloj nga vetja, 121 Deputetët dhe Qeveria pagën e nentorit dhe dhjetorit mos ta marrin por ta kaloj në buxhet për këtë fatkeqësi të madhe”, shkruan deputeti ndër të tjera.

POSTIMI I PLOTE I DEPUTETIT LEFTER MALIQI

Sot jemi në ditët e zisë kombëtare, mbijetesës, solidarizimit, mbështetjes për çdo të dëmtuar, tramatizuar si dhe duke ngushëlluar familjet për humbjen e njerëzve më të dashur në këtë fatkeqësi natyrore me përmasa shumë të mëdha e të rënda. Fjala festa të Nëntorit s’duhet të egzistojë në gojën e Qeverisë.

Ti lemë lotët e krokodilit, s’dua të bëj politikë, por të motivojmë njerëzit e dëmtuar, traumatuzuar, që kanë humbur njerëz, shtëpi e gjithçka, tu qëndrojmë në krah, në mbështetje morale e psikologjike.

Në kohën dhe momentin e duhur do flasim për përgjegjësit por Qeveria tu jap mbështetje për strehim menjëherë, tu jap zgjidhje, shpresë e besim, duke anulluar çdo investim miliona euro për rrugët e unazës së re, të Milot-Balldrem, të Dukatit dhe investime të tjera nga buxheti i planifikuar për 2020 por menjëherë ti njoftoj qytetarët, të mbledhë Parlamentin dhe ndryshoj buxhetin duke akorduar këto fonde për strehimin, financimin e çdo të dëmtuari si dhe mbështetje më të madhe morale e financiare për familjet që kanë humbur jetë njerëzore.

Kryeministria ka parashikuar për buxhetin e vet 2 fishin e vitit të kaluar për portalet, luksin, dietat etj, të japë shembull nga vetja Kryeministri. Parlamenti të mblidhet urgjent për këto ndryshime dhe të filloj nga vetja, 121 Deputetët dhe Qeveria pagën e nentorit dhe dhjetorit mos ta marrin por ta kaloj në buxhet për këtë fatkeqësi të madhe.

Zoti e bekoftë Shqipërinë, mirënjohje mediave, shtabeve të emergjencave, popullit shqiptar për çdo mbështetjeje që po japin, mirënjohje partnerëve ndërkombtar por mbi të gjitha mirënjohje e thellë e pakufishme ndaj popullit Kosovar. God bless you.