Ministrja e Infrastrukturës dhe Energjisë, Belinda Balluku, ka paraqitur disa ankesa dje në Komisionin e Veprimtarive Prodhuese, teksa ishte thirrur për të raportuar për projektbuxhetin e vitit të ardhshëm.
Gjatë raportimin e saj, Belinda Balluku theksoi se në hartimin e këtij projektbuxheti për vitin 2020, nga Ministria e Financave janë marrë parasysh konsultimet e çuara, duke bërë që shumë projekte të planifikuara të mbesin të parealizuara. Ministrja e Infrastrukturës vuri theksin në zerimin e fondit për ndërtimin e hekurudhës Tiranë–Durrës, që, sipas saj, ishte në fazën finale.
“Ky buxhet kurrsesi nuk mund të quhet buxheti i infrastrukturës. Fatkeqësisht, ndërkohë që jemi përpara faktit dhe të gjitha studimet dhe projektimet për hekurudhën shqiptare tashmë kanë avancuar, ne kemi identifikuar se në buxhetin 2020, Ministria e Financave e ka zeruar fondin për hekurudhat, duke hequr 100 milionë lekë nga financimi i brendshëm dhe 200 milionë lekë nga financimi i jashtëm. Pas një lufte të gjatë për hekurudhën, tani nuk kemi fonde për ta vazhduar. Jemi në një pozicion të vështirë, pasi një nga projektet më të rëndësishme që ne kemi dhe pjesë e strategjisë së transportit sot, rrezikohet për shkak të një buxheti të prerë. MFE nuk mund të bëjë një buxhet të njëanshëm dhe pa marrë parasysh konsultimet”, u shpreh ministrja Belinda Balluku gjatë raportimit të saj në Kuvend.
Edhe pse e pakënaqur, ministrja Balluku sërish u shpreh optimiste se sektori që drejton do të ketë performancë pozitive për vitin 2020.
“Pavarësisht pengesave që paraqet në punën tonë ulja e ndjeshme e tavaneve pothuajse në të gjitha sektorët, unë do të thosha që angazhimi dhe performanca e ministrisë do të jetë akoma më e mirë se në vitin 2019. Do t’i luteshim Ministrisë së Financave që financimi i projekteve ekzistuese të bëhej në kohë dhe të mos pengohej ecuria e tyre dhe si rrjedhojë të mos ndryshohej afati i dorëzimit sepse na duhet të përmbushim angazhimet tona dhe të mos krijojmë më detyrime të prapambetura. Vonesa kryesore e realizimit të projekteve është problemi i shpronësimeve, jo rrallëherë kemi pasur edhe mungesë fondesh. Ne shpesh nisim projektin pa identifikuar vlerën që do kërkojnë shpronësimet. Shpronësimet në disa raste kalojnë vlerën e vetë projektit. Më tej, ministrja e Infrastrukturës dhe Energjisë ka folur për tri projektet kryesore që do të financohen gjatë vitit të ardhshëm. Aeroporti i Vlorës, rruga ThumanëRrogozhinë dhe Tuneli i Llogorasë, janë tri veprat prioritare sipas saj.
