LIGJET E BIZNESIT
Me kërkesën e Presidentin Emmanuel Macron, Asambleja Kombëtare franceze diskutoi ditën e djeshme çështjen e azilantëve. Sipas asaj që shkruajnë mediet franceze, autoritetet atje janë të shqetësuara për numrin e lartë të aplikimeve që vijnë nga vendet që konsiderohen “të sigurta”, Shqipëria dhe Gjeorgjia.
Në fjalën e tij, Kryeministri i Francës, Edouard Philippe, pranoi se tema është shqetësuese për francezët, duke shtuar se lufta kundër emigracionit të paligjshëm po bëhet më e fortë, por duke thënë se Franca do duhet të fillojë që të ketë një qasje më pragmatike në lidhje me emigracionin profesional.
Franca është një nga vendet e pakta europiane, ku është rritur numri i kërkesave për azil, me 123,000 raste në vitin 2018. Autoritetet franceze kanë shprehur shqetësim për kërkesat që vijnë nga vende “të sigurta” si Shqipëria dhe Gjeorgjia, duke shkaktuar debate politike që po ndajnë shoqërinë franceze dhe deputetët në Asamblenë Kombëtare, madje edhe në mesin e shumicës që mbështesin Presidentin Emanuel Makron.
Dje, gjatë diskutimit në Asamblenë Kombëtare, Kryeministri i Francës prezantoi gjashtë linja pune, duke përfshirë një reflektim mbi përfitimet sociale të përfituara nga azilkërkuesit, për të adresuar boshllëqet që ai vetë e pranoi se ekzistonin në politikën franceze të imigracionit.
“Franca nuk duhet të jetë as më shumë e as më pak tërheqëse se fqinjët e saj për emigrantët”, shpjegoi Edouard Philippe, duke bërë thirrje për debat për zgjidhjen e kësaj çështjeje pa mbajtur asnjë tabu, por edhe pa mohuar parimet franceze veçanërisht në lidhje me kushtet e qasjes në shërbimet sociale të emigrantëve. Asambleja nuk mori asnjë vendim, por ishte në vazhdën e debatit për këtë çështje, që pritet të vazhdojë edhe të mërkurën në Senat.
NDRYSHIMET
Presidenti francez Macron nga ana tjetër ka kërkuar që çështja e emigracionit të vihet në krye të axhendës sociale, duke tentuar të mbushë boshllëqet politike, siç bëri në vitin 2018 kur diskutoi ligjin për Azilin dhe Emigracionin.
Në kërkesën e parashtruar ndaj Asamblesë, Macron ka theksuar se emigracioni dhe raporti me azilantët do të jetë temë kryesore në zgjedhjet presidenciale të 2020-ës. Një vit më parë, Macron dëshironte të ishte elementi balancues midis pozicioneve të ndryshme, por vetëm arriti të nxjerrë në pah ndarjet midis partive dhe organizatave qytetare.
Në fund të shtatorit, Macron u kthye në qasjen pragmatike, duke thënë se “Franca nuk mund të strehojë të gjithë azilantët, edhe nëse dëshiron t’i mirëpresë”, në një sinjal politik që ka ndarë edhe një herë bazën e tij të mbështetjes politike. Ky zhvillim vjen një vit pasi Franca miratoi ligjin e Azilit dhe Emigracionit.
NEGOCIATAT
Ky zhvillim në politikën e brendshme të Francës pritet të ketë një ndikim jo të vogël në vendimin që do të marrë Franca në lidhje me hapjen ose të procesit të negociatave me Bashkimin Europian për Shqipërinë dhe Maqedoninë e Veriut. Bashkë me Holandën dhe Danimarkën, Franca shihet si një nga vendet skeptike sa i përket çështjes së zgjerimit të Bashkimit Europian. Ndryshe nga vendet e tjera, Franca si problem madhor në këtë proces shikon çështjen e emigrantëve që kërkojnë azil.
Mes Shqipërisë dhe Maqedonisë së Veriut, vendi ynë sërish është në disavantazh, pasi në diskutimin e bërë në Asamblenë Kombëtare këtë të hënë, përmendej Shqipëria dhe Gjeorgjia, si dy vende me numër të lartë të aplikantëve për azil. Vendimi final, sa i takon Francës, është në dorën e Presidentit Macron për t’i dhënë ose jo dritën jeshile hapjes së negociatave për Shqipërinë dhe Maqedoninë e Veriut.
Negociatat, Macron takohet me Presidentin e PE
Presidenti i Parlamentit Europian, David Sassoli, ka zhvilluar një takim me Presidentin e Francës, Emanuel Macron, ku fokusi i takimit mësohet se ka qenë dalja e Britanisë së Madhe nga BE dhe çelja e negociatave me Shqipërinë dhe Maqedoninë e Veriut.
Përpos çështjeve të tjera të rëndësishme, Sassoli mësohet ta këtë shfrytëzuar këtë vizitë të tij të parë zyrtare në Paris për të mësuar opinionin e kreut të shtetit francez, Macron, që deri më tani, bashkë me Holandën dhe Danimarkën janë konsideruar si skeptikët për t’i hapur rrugë negociatave me këto dy vende.
“Ne duhet të përgatisim punën në terren të kërkuar për të siguruar që marrëdhënia, mund, dhe do të vazhdojë edhe në një epokë pas Brexit”, është shprehur Sassoli gjatë takimit me Macron. Në mbledhjen e 17 tetorit, një vend të gjerë do të ketë edhe çështja e BREXIT.
Ky takim i Macron me Sassolin vjen në kohën kur kanë mbetur më pak se 10 ditë nga mbledhja e Këshillit Europian që do të vendosë për hapjen ose jo të negociatave të BE-së me Shqipërinë dhe Maqedoninë e Veriut. Për Francën, shqetësuese është çështja e azilantëve, më së shumti nga Shqipëria, dhe për këtë qëllim ka filluar të mendojë për ndryshime në ligjin për asistencën ndaj emigrantëve nga vendet e sigurta, siç konsiderohet edhe Shqipëria./ Panorama
