LIGJET E BIZNESIT
Kryeministri Edi Rama dhe ministrja e Mbrojtjes, Olta Xhaçka kanë reaguar ashpër, duke përgënjeshtruar një lajm të rremë të përhapur në rrjetet sociale dhe në disa portale, sipas së cilit sonte në orën 23.30 minuta do të bjerë një tërmet i fuqishëm me magnitudë 6 ballë.
Rama e konsideron këtë lajm një Fake News kriminal që përhap panik te qytetarët.
“Ky është një Fake News kriminal për të përhapur panik dhe çdo idiot që shkruan për parashikime tërmetesh thjesht duhet neveritur”, shkruan Rama në facebook.
Ndërkaq, një reagim zyrtar për këtë lajm ka pasur edhe nga Ministria e Mbrojtjes. Duke e konsideruar një lajm të rremë, ky dikaster thekson se ata që kanë shpërndarë këto njoftime dashakeqe do të mbajnë përgjegjësi penale.
“Prej disa minutash qarkullon në disa portale dhe rrjete sociale një lajm i rremë mbi parashikimin e një tërmeti me përmasa, në orën 23.30. I bëjmë thirrje të gjithë qytetarëve, të mos bien pre e njoftimeve të tilla keqdashëse dhe përhapëse paniku pasi nuk ka asnjë parashikim të tillë shkencor nga asnjë institucion shkencor.
Gjithçka po tentohet të bëhet për të përhapur panik mes qytetarëve është kriminale. Të gjithë ata që kanë përhapur këtë lajm do të mbajnë përgjegjësi penale”, theksohet në njoftimin e ministrisë.
