LIGJET E BIZNESIT
Në intervistën e parë televizive pas pushimeve, nënkryetari i Partisë Demokratike, Edi Paloka ka bërë disa deklarata të bujshme. Mes tyre, Paloka është ndalur edhe në çështjen më të bujshme të verës atë të kryebashkiakut të Vorës, Agim Kajmaku.
Sipas tij Kajmaku nuk do të lëshohet nga Rama për shkak të “nderit” që ky i ka bërë, duke i zbukuruar bahçen e Ramës në vilën e tij në fshatin Surrel.
“Ka një vendim qeverie që i jep Kajmakut, nuk e di se sa euro, për të zbukuruar Surrelin. Jo vetëm e zbukuroi vilën e Ramës, por tani bën edhe bahçevanin aty. Pra, asgjë nuk është e rastësishme, Rama e ka krijuar vetë këtë qerthull dhe nuk e di si do ta zgjidhë”, tha Paloka.
Më tej, ish-deputeti foli dhe për Valdrin Pjetrin, i cili dha dorëheqjen nga posti i kryebashkiakut të Shkodrës, pas fakteve të publikuara nga opozita, ku rezultonte se ka qenë i dënuar në Itali për trafik droge. Lidhur me këtë, Paloka tha se Rama e dinte të vërtetën më parë, por e çoi Valdrinin me zor në Shkodër.
“Ai ka shkuar me vetëdije në këtë pikë, që nga farsa e 30 qershorit, vendosja e figurave kriminale, si Valdrini në Shkodër, që e çoi me zor. Me Kajmakun ka mbyllur gojën, e di shumë mirë, se i ka zgjedhur vetë”, theksoi Paloka.
