OKB/ Rama kujton tragjedinë me dy ushtarët e vrarë në Letoni

Kryeministri Edi Rama teksa ka mbajtur fjalën e tij në Asamblenë e Organizatës së Kombeve të Bashkuara, është ndalur dhe te ngjarja e rëndë që tronditi vendin pak muaj më parë, ku dy ushtarë shqiptarë humbën jetën në Letoni, gjatë misionit për çmontimin e lëndëve eksplozive.
Nga OKB, kreu i qeverisë shqiptare tha se Shqipërisë i rëndon ende kjo ngjarje tragjike,me dy ushtarët shqiptarë, major Klodian Tanushi dhe Zarife Hasanaj, të cilët humbën jetën tragjikisht, por pavarësisht kësaj vendi ynë vijon misionet ndërkombëtare për rikthimin e stabilitetit në botë.

“Shqipëria ka dislokuar trupat e saj në Kosovë, e vende të tjera, me qëllim që të lërë gjurmë në botë. Vetëm muaj më parë dy ushtarë shqiptarë, që ishin pjesë e NATO në Letoni, humbën jetën e tyre, teksa çmontonin eksploziv.

Pavarësisht humbjes tragjike, që na rëndon fort, e na ka lënë shenjë në shpirt, Shqipëria ende shpreh vullnetin e saj për të ndërmarrë misione të reja në Irak, për të mbështetur përpjekjet e tij për stabilitet. Të gjithë duhet të jemi të ndërgjegjshëm nga rreziku që vjen nga grupet terroriste”, tha Rama.