Një ditë pas raportit të OSBE-ODIHR, Basha mbledh aleatët në selinë e PD

Ditët e para të muajit shtator janë shoqëruar me takime intensive në selinë e Partisë Demokratike.

Sot mësohet se kryedemokrati Lulzim Basha do të zhvillojë një takim me aleatët e tij.

Mbledhja do të mbahet pasditen e sotme rreth orës 19:00.

Opozita ka paralajmëruar nisjen e aksionit opozitar në vjeshtë, ndërsa kërkesa e saj mbetet qeveria tranzitore pa Ramën kryeministër që do të çojë vendin në zgjedhje të lira. Takimi me aleatët opozitarë vjen një ditë pasi OSBE/ODIHR publikoi raportin për procesin e 30 qershorit, ku opozita vendosi të mos garojë me kandidatët e saj.

Një ditë më parë kryedemokrati Basha zhvilloi një takim me Drejtorin e ri të Zyrës së Europës Jugore dhe Qendrore në Departamentin e Shtetit, David Kostelancik. Në një reagim në “Twitter”, kryedemokrati Basha tha se fokusi i bisedës me zyrtarin e lartë u përqendrua tek dhënia fund e pandëshkueshmerisë së politikanëve, rikthimin e sundimit të ligjit, por edhe forcimit të partneritetit strategjik mes Shqipërisë dhe SHBA.