LIGJET E BIZNESIT
Drejtori për Europën Qendrore dhe Jugore në Departamentin e Shtetit të SHBA, David Kostelancik, do të nisë sot takimet zyrtare me drejtuesit më të lartë politikë në vend.
Mbërritja në Shqipëri e drejtorit të DASH për Ballkanin, shikohet si një mundësi për zgjidhjen e krizës politike në vend.
Mësohet se axhenda e takimeve të zyrtarit të lartë të DASH do të nisë në orën 11:00 në Kryesinë e Kuvendit me kryeparlamentarin Gramoz Ruci, për të vijuar në orën 14:00 me kryedemokratin Lulzim Basha.
Më pas Kostelancik do të takohet me kryetaren e LSI-së Monika Kryemadhi dhe më pas në orën 17:00 do të takohet me kryeministrin Edi Rama.
Në fokus të takimeve pritet të jetë kriza politike në të cilën po kalon vendi ynë, e curia e reformave, kryesisht ajo në drejtësi si dhe negociatat me Bashkimin Europian, për të cilat Shqipëria pret të marrë një datë më 18 tetor.
Nuk dihet ende nëse zyrtari i DASH do të tentojë të ulë palët në një marrëveshje për gjetjen e një zgjidhjeje mbi krizën politike në vend, apo do të dëgjojë interpretimet e secilës palë, pa tentuar në gjetjen e një rruge që do t’i japë fund krizës.
Kostelancik ka qenë pjesë e stafit të ambasadës amerikane në Tiranë, çka do të thotë se ai njeh jo pak mjedisin politik shqiptar. Kjo ndoshta mund t’a ndihmojë zyrtarin e DASH që të ketë më pak vështirësi në gjetjen e një rruge për zgjidhjen e krizës, nëse do të marrë një mision për të ndërmjetësuar palët.
