“Ke vënë blloqet në zonën time”, zbardhet shkaku i masakrës që terrorizoi dje Prishtinën

Një masakër e vërtetë tronditi ditën e djeshme qytetin e Prishtinës, ku një person qëlloi me kallashnikov mbi 4 persona në “Lagjen e Spitalit”, ku si pasojë e plumbave mbetën të vrarë dy persona e u plagosën rëndë dy të tjerë.

Kështu, një ditë pas krimit të rëndë janë zbardhur dhe motivet.

Sipas mediave në Kosovë bëhet fjalë për një pronë, ku disa vite më parë ka nisur një konflikt mes dy familjeve, Rafuna dhe Mehmeti, të cilat janë bashkëpronare të një ndërtese në Prishtinë.

Zyra e Kadastrës në Komunën e Prishtinës ka bërë edhe ndarjen e hapësirave që u takon secilës prej familjeve, por mesa duket konflikti midis tyre nuk ishte shuar. Sipas “Indeksonline”, sherri ka nisur pasi një anëtar i familjes Mehmeti kishte vendosur disa blloqe pllakash në zonën e familjes Rafuna. Por një prej anëtarëve të familjes Rafuna ka larguar me shqelm blloqet e vendosura duke thënë se ‘i ke vendosur në pronën e tij.

Konflikti ka vijuar dhe anëtarët e familjes Mehmeti që kanë goditur fizikisht një anëtar të familjes Rafuna. Më pas situata ka degjeneruar në përdorimin e armëve të zjarrit.