Gruaja e kryeministrit Edi Rama, Linda Rama ka dhënë sot një mesazh mjaft të fortë për gratë dhe vajzat shqiptare.
Në fjalën e mbajtur në Global Women Club Kosovo 2019, Linda Rama është shprehur se askush më shumë se vetë gruaja nuk mund të luftojë për lirinë në shtëpi dhe për clirimin e shtëpisë së përbashkët nga gardhet që ngre koha e re e nga hijet që sjell koha e shkuar.
Duke kujtuar kohët e vështira e plot vuajtje të grave kosovare, teksa dëgjoheshin masivisht fjalët “liri” dhe “shtëpi”, Linda Rama theksoi se ato dy fjalë janë kështu vizioni më I bukur për Kosovën e re dhe më i sigurt për gruan shqiptare përtej kufinjve gjeografikë.
“S’kam për ta harruar kurrë, ishim edhe ne si të hutuar, si të mpirë nga një tragjedi familjare, donim të ndihmonim sadopak dhe në komunikimet ku përpiqeshim të kuptonim, se për çfarë kishin ndonjë nevojë më specifike, çfarë u mungonte më shumë, nga fëmijët më të rritur dëgjonim më së shumti fjalën “liri”, ndërsa gratë fjalën “shtëpi”!
Sot, 20 vite nga ajo kohë nuk do të guxoja kurrsesi të thosha, këtu përpara jush se çfarë shkon a çfarë nuk shkon sot në Kosovë. As nuk do të doja kurrë të jepja mend, siç i themi ne, mbi çfarë duhet e çfarë s’duhet të bëjnë gratë dhe burrat e Kosovës. Por ato dy fjalë, “liri” dhe “shtëpi”, më janë dukur gjithnjë e më shumë, vizioni më i bukur për Kosovën e re dhe mbase, përkufizimi më i sigurtë për gruan shqiptare përtej kufijve gjeografikë”, shton ajo gjatë fjalës së mbajtur.
