BB: Kukësi dhe Elbasani më të varfrit në Ballkan. Tirana po rritet me ritme të ulta

Një raport i fundit i Bankës Botërore për zhvillimin e rajonit të Ballkanit Perëndimor vlerëson se Elbasani dhe Kukësi janë më të varfrit. Por edhe Tirana po rritet nën mesataren e Ballkanit Perëndimor dhe Kroacisë e cila ka rritjen dhe zhvillimin më të madh.

Prefekturat në fjalë sipas të dhënave të INSTAT janë më të varfrat në Shqipëri, por gjithashtu janë më të varfrat e 20 rajoneve më të varfra të Ballkanit.

Banka Botërore citon në raport se, dy prefekturat shqiptare kanë rënë në kurthin e dyfishtë te varfërisë, që do të thellojë më tej atë.

Të ardhurat e qarqeve Elbasan dhe Kukës janë shumë poshtë mesatares kombëtare. Po ashtu ekonomia e tyre në vend që të rritet është më rënie ose po rritet me ritme shumë të ulëta duke e zbehur projeksionet për tu afruar me standardet kombëtare dhe rajonin e Ballkanit.
Raporti vlerëson se ndër vendet e Ballkanit të marra në studim, Kroacia ka nivelin më të lartë te të ardhurave sipas rajoneve.

20 nga 45 rajone jashtë Kroacisë kualifikohen me të ardhura të ulëta nën pragun mesatar rajonal të 75 për qind të PBB për frymë.

Midis rajoneve me të ardhura të ulëta janë Podunvjle, Raska dhe Rasina (Serbi); Polog (Maqedonia e Veriut); Kukësi dhe Elbasani, ndërsa 14 rajonet e tjera me të ardhura të ulëta po rriten mbi nivelin mesatar rajonal. Ato mund të konsiderohen në rrugën e konvergjencës.
Disa metropole me të ardhura më të larta, veçanërisht në Kroaci dhe Serbi, po rriten shumë poshtë mesatares së Ballkanit Perëndimor dhe Kroacisë. Mes tyre janë kryeqytetet e Beogradit, Tiranës dhe Zagrebit.

Ndërsa shumica e rajoneve të varfra në Ballkan janë në një rrugë integrimi që do të thotë se ritmi i rritje së tyre premton afrimin me standardet kombëtare, disa rajone janë në rrugë divergjence, ose jointegrimi. Pra, ekonomia e tyre kombëtare po rritet, kurse këto rajone po pësojnë rënie.

Disa rajone të tjera në Ballkan, të cilat i kanë të ardhurat për frymë në nivele të larta krahasuar me mesataren kombëtare po rriten me ritme të ulëta. Këto janë Banat i Veriut, Banat i Qendrës, Bor dhe Braniceva në Serbi, Pelagonia në Maqedoninë e Veriut, Vlora në Shqipëri./Gazeta Si