Një sasi eksplozivi ka shpërthyer mbrëmjen e së hënës në oborrin e një vile në zonën e Kamzës, fatmirësisht duke shkaktuar vetëm dëme materiale.
Shpërthimi ka ndodhur rreth orës 22:14, në afërsi të shtëpisë 5-katëshe që ndodhet në rrugën “Mujo Ulqinaku”, por anëtarët e familjes kanë shpëtuar pa dëmtime, duke qenë se jetonin në katet e sipërme.
Valës shpërthyese të eksplozivit, që dyshohet të ketë qenë tritol, nuk i ka shpëtuar as një automjet që ndodhej i parkuar në oborr. Burimet thanë se ngjarja ka ndodhur në banesën e shtetasin Gjergji Kola, i cili ka pretenduar se nuk ka probleme me njeri.
Në njoftimin zyrtar, Policia e kryeqytetit shprehet se në momentin e shpërthimit nuk ka pasur njeri në shtëpi, megjithëse familjarët thanë dje se ndodheshin brenda, por në katet e sipërme. Policia thekson gjithashtu se e ka identifikuar autorin e dyshuar të ngjarjes dhe po punon për kapjen e tij.
“Më datë 19 gusht, rreth orës 22:14, në rrugën ‘Mujo Ulqinaku’, në Kamzë, në oborrin afër derës së banesës së shtetasit Gj. K., ka shpërthyer një sasi e vogël lënde e dyshuar plasëse, duke shkaktuar dëme të vogla materiale. Në momentin e shpërthimit në banesë nuk ka pasur njeri. Pas veprimeve të para hetimore, Policia ka identifikuar autorin e dyshuar dhe po punon për kapjen e tij. Për arsye hetimore, nuk bëhen me dije të dhënat e tij”, tha zyrtarisht Policia e Tiranës.
Sa i përket motivit të kësaj ngjarjeje, edhe Policia, edhe vetë familjarët shprehen të rezervuar. Ata flasin për një konflikt të brendshëm, familjar, por pa dhënë detaje rreth këtij konflikti.
Ndërsa në Polici, i zoti i shtëpisë ka theksuar se nuk ka probleme me askënd dhe nuk mund të japë asnjë emër konkret si autor të dyshuar të kësaj ngjarjeje.
Edhe disa banorë të zonës pranë vendit ku ndodhi ngjarja, tregojnë se sulmi me eksploziv mund të ketë ardhur si pasojë e konflikteve familjare që Gjergji Kola ka pasur, duke qenë se ai ishte person i qetë dhe nuk kishte probleme me persona të tjerë.
Burime nga Policia thanë se Kola, prej disa kohësh ka pasur probleme të brendshme, të cilat nuk i ka adresuar as në Polici, as te të afërmit e tij./PANORAMA
