Në Shqipëri ka shpërthyer një skandal me shpenzimet e luksit të Ministres së Drejtësisë Etilda Gjonaj. Në media janë publikuar fatura hotelesh, që kapin shifrën marramendëse 700 euro për një natë, një luks i shfrenuar dhe i pajustifikueshëm.
Por, ndryshe nga Etilda që bën shpenzime luksi me paratë e taksapaguesëve shqiptarë, liderët botërorë, duket se janë më të kursyer kur vjen puna për të shpenzuar paratë e qytetarëve. Kështu, sipas gazetës britanike Express, në vitin 2017, në Samitin e G20 në Hamburg, presidenti francez, Emanuel Macron, ka shpenzuar 200 euro nata për të qëndruar në hotel. Ndërsa presidenti turk, Recep Tayip Erdogan, i cili njihet për shpenzimet luksoze në Turqi, qëndroi në një hotel me çmim modest prej 250 euro nata. Po kështu, kryeministrja britanike, Theresa May, qëndroi në një hotel me çmim 450 euro nata.
Të gjithë këta liderë të vendeve të pasura, kanë zgjedhur akomodim modest, për të marrë pjesë në Samitin e G20 në vitin 2017. Duhet të kujtojmë, se për shkak të mbajtjes së këtij Samiti, çmimet e hoteleve ishin rritur në Hamburg, por sërish këta liderë, kanë gjetur alternativa me çmime modeste.
Ndërsa, Ministrja e Drejtësisë në vendin më të varfër në Europë, Etilda Gjonaj, i ka lejuar vetes shpenzime stratosferike. Ajo ende nuk ka dhënë shpjegime për qytetarët shqiptarë lidhur me këto udhëtime dhe mënyrën se si ka shpenzuar paratë e taksapaguesëve..
Një burim nga Ministria e Drejtësisë, ka deklaruar për gazetën Tema, se gazetari që ka publikuar faturat e ministres, nuk i ka parë ato në kompleksitet dhe nuk ka pyetur për numrin e udhëtarëve.
“Burime zyrtare të Ministrisë së Drejtësisë i pohuan gazetatës TemA, se i kanë ofruar portalit në fjalë faturat dhe konfirmojnë orgjinalitetin e tyre, por kanë theksuar se askush nuk ka bërë pyetje rreth kompleksitetit të faturës, numrit të personave që kanë udhëtuar, ditët që kanë fjetur, natyrën e udhëtimit, ndonjëherë të minutës së fundit dhe çmimet e asaj periudhe. Pra nuk ka pasur pyetje shpjeguese për faturat dhe në dukje ato ngjajnë si një zbulim“, shkruan Mero Baze.
Por, po ti hedhësh një sy faturave të publikuara në media, aty gjendet edhe numri i personave që kanë fjetur në dhomat luksoze dhe rezulton se aty ka qëndruar vetëm një person, pra ministrja.
Skandali i ministres Gjonaj, është komentuar edhe nga kryeministri Rama, i cili e ka quajtur mediat që publikoi faturat, “një kazan”, por pa i mohuar shpenzimet luksoze të ministres.
/TPZ.al/
