Ka vijuar edhe sot aksioni i qeverisë kundër informalitet në bizneset e mëdha. Në këtë kuadër, sot ministrja e Financave, Anila Denaj ka asistuar në një aksion ku janë bllokuar 500 mijë litra birrë në një fabrikë me vendndodhje në Kashar. Shkak për këtë janë bërë detyrime akcize të papaguara në shumën rreth 17.6 milionë lekësh.
Po ndëshkimi ndaj kësaj fabrike nuk është ndalur vetëm te sekuestro e mallit, por i është vënë edhe një gjobë e majme prej 70 milionë lekë, pasi hedhja për konsum e kësaj sasie birre, pa paguar detyrimet e akcizës, sipas ligjit, përbën kundërvajtje administrative dhe dënohet me 3-fishin e detyrimeve të akcizës që duheshin paguar.
Gjatë fjalës së saj pas këtij aksioni ministrja Denaj paralajmëroi të gjitha subjektet e tjera të kësaj natyre, por jo vetëm që të evidentojnë të gjithë mallin që kanë në magazina brenda një regjimi fiskal, në të kundërtën do të kenë të njëjtin fat.
“Evidenca e 70 mln lekëve që duhet të jenë të paguara nga subjekti janë pjesë jo vetëm e detyrimeve, por edhe 3-fish gjobë. Kjo shumë nuk justifikon asnjë model biznesi. Evidentoni të gjithë mallin brenda një regjimi fiskal. Çdo magazinë fiskale do të kontrollohet, duke filluar nga ato më të voglat tek ato më të mëdha”, u shpreh Denaj.
