Në kërkim ndërkombëtar për prostitucion dhe skllavërim, arrestohet pas 14 vitesh vlonjati (EMRI)

Policia e Vlorës ka arrestuar ditën e sotme një 40-vjeçar të shpallur në kërkim ndërkombëtar .

Mësohet se 40-vjeçari Ervin Farija, akuzohet për veprat penale “Organizatë kriminale, shfrytëzim prostitucioni dhe skllavërim”.

Ai është dënuar me 6 vjet burg nga gjykata e Milanos në Itali me një vendim të vitit 2005.

NJOFTIMI ZYRTAR I POLICISE

Vlorë

Vijon puna për kapjen e personave në kërkim ndërkombëtar.

Vihet në pranga një shtetas me qëllim ekstradimi drejt Italisë.

Arrestohet provizorisht 40 vjeçari E. F., lindur në Fier dhe banues në Vlorë, për veprat penale “Organizatë kriminale, shfytëzim prostitucioni dhe skllavërim”.

Në bazë të informacioneve të marra në rrugë operative, Strukturat e Drejtorisë Vendore të Policisë Vlorë dhe Interpol Tirana, kanë bërë kapjen e 40 vjeçarit në qytetin e Vlorës duke e vendosur para përgjegjësisë penale si më poshtë:

Autoritetet gjyqësore italiane konkretisht Gjykata e Milanos Itali, me anë të një vendimi në vitin 2005, e ka dënuar shtetasin E. F me 6 vite burgim për veprat penale “Organizatë kriminale, shfytëzim prostitucioni dhe skllavërim” parashikuar nga nenet 99, 81, 110, 602 dhe 416 të Kodit Penal Italian.

Materialet i kaluan Prokurorisë pranë Gjykatës së Shkallës së Parë Vlorë për veprime të mëtejshme.