“U ul në gjunjë për të më falenderuar” Bill Clinton kujton momentin emocionues me kamarierin shqiptar

Ish-presidenti amerikan Bill Clinton gjatë vizitës së sotme në Kosovë me rastin e 20-vjetorit të clirimit, gjatë fjalës së tij ka kujtuar një moment të veçantë që i kishte ndodhur në një hotel në SHBA.

Ai ka rrëfyer se një kamarier shqiptar i është ulur në gjunjë për ta falenderuar për atë që kishte bërë për Kosovën.

Clinton ndër të tjera shtoi se këto janë momente që ndodhin çdokund, megjithatë shtoi se ky episod me kamarierin shqiptar ishte gjëja me e mrekullueshme që i kishte ndodhur pas 19 vitesh që kishte lënë Shtëpinë e Bardhë.

“Qëkur kam lënë Shtëpinë e Bardhë 19 vjet më parë, gjëja më e mrekullueshme që më ndodh është që dikush më ndalon në New York apo diku tjetër në botë për të bërë një fotografi. Apo kur isha në një hotel, një kamarier shqiptar erdhi dhe më ra në gjunjë për të më falenderuar. Kjo është një gjë e mrekullueshme”, ka rrëfyer Clinton i emocionuar.

Ai thotë se i pëlqen shumë populli shqiptar dhe kosovarët dhe thotë se Amerika ka nevojë për të gjithë, por thekson se atyre duhet t’iu ofrohet mundësi e barabartë që të ndërtojnë të ardhmen e tyre në Kosovë.

“Më pëlqejnë shqiptarët dhe kosovarët, ne kemi nevojë për juve. Por të rinjtë duhet të kenë mundësitë që të ndërtojë të ardhmen e tyre këtu në Kosovë”, është shprehur Clinton gjatë fjalës së tij.