LIGJET E BIZNESIT
Vendimi i presidentit Ilir Meta për të anuluar datën e zgjedhjeve lokale më 30 qershor ka sjellë një situatë të re politike në vend. Mëngjesin e kësaj të hënë pas pak minutash presidenti i vendit, Ilir Meta pritet të dalë në një konferencë të jashtëzakonshme për mediet, ku do të jap të gjitha shpjegimet ligjore dhe morale të vendimit të tij.
Sakaq në medie në këto dy ditë kanë qarkulluar disa skenarë të ndryshëm për ecurinë e situatës politike në vend.
Sipas Gazeta Si këto janë 5 skenarët e mundshëm për daljen nga kriza e thellë politike që ka përfshirë vendin. / Skenari i parë është që të shpërfillë vendimin e Presidentit dhe të detyrojë Komisionin Qendror të Zgjedhjeve që të vazhdojë me përgatitjet për zgjedhjet. Në mungesë të Gjykatës Kushtetuese, kjo do të thellonte edhe më tej krizën si politikisht, ashtu edhe ligjërisht e institucionalisht.
Skenari i dytë është që mazhoranca të sigurojë votat e nevojshme në Parlament për të shkarkuar Presidentin Ilir Meta. Edhe ky është një mision i vështirë. Për të siguruar numrin e nevojshëm socialistëve u duhen votat e deputetëve të rinj të opozitës, që sado dolën kundër vendimit për djegien e mandateve, vështirë se do të miratonin një shkarkim të Presidentit.
Skenari i tretë është i përshpejtimit me reformën në drejtësi dhe ngritja e Gjykatës Kushtetuese. Kjo e fundit do të interpretonte më pas dekretin e Ilir Metës. Ky skenar kërkon kohë përtej 30 qershorit dhe për më tepër nuk ofron garanci se vendimi në fund do t’i japë të drejtë qëndrimit të mazhorancës.
Skenari i katërt; palët do të ulen në tryezë dhe të gjejnë një rrugëdalje nga kjo krizë përmes një marrëveshjeje. Marrëveshja do të ndryshonte Kodin Zgjedhor dhe “zgjidhte duart” Presidentit për dekretimin e një date tjetër për zhvillimin e procesit, me gjasa në vjeshtë.
Skenari pestë, akoma më i pamundur, duket ai i dorëheqjes së Kryeministrit Rama duke plotësuar kështu kërkesën e Partisë Demokratike për qeveri tranzitore dhe zgjedhje të parakohshme, apo braktisjes së kësaj kërkese nga Lulzim Basha dhe gjetja e një marrëveshjeje me Ramën për të hyrë në zgjedhjet vendore, e për të pritur 2021-in për t’u përballur në zgjedhjet për Parlamentin.
